തദ്ദേശ തിരഞ്ഞെടുപ്പിൽ ബിജെപിക്ക് 34.49 ലക്ഷം വോട്ടുകൾ; സംഘടനാശക്തി തെളിയിക്കുന്ന കണക്കുകൾ നവ മാധ്യമ പ്രവർത്തകൻ വിനയ് മൈനാഗപ്പള്ളി എഴുതുന്നു

---

തദ്ദേശ തിരഞ്ഞെടുപ്പിൽ ബിജെപിക്ക് 34.49 ലക്ഷം വോട്ടുകൾ; സംഘടനാശക്തി തെളിയിക്കുന്ന കണക്കുകൾ

നവ മാധ്യമ പ്രവർത്തകൻ വിനയ് മൈനാഗപ്പള്ളി എഴുതുന്നു

ഇത്തവണത്തെ തദ്ദേശ സ്വയംഭരണ തിരഞ്ഞെടുപ്പുകൾക്ക് ശേഷം കേരള രാഷ്ട്രീയത്തിൽ ശ്രദ്ധേയമായ ഒരു കണക്കാണ് പുറത്തുവരുന്നത്. 2025 തദ്ദേശ തിരഞ്ഞെടുപ്പിൽ ബിജെപി കേരളത്തിലാകെ നേടിയത് 34,49,326 രാഷ്ട്രീയ വോട്ടുകൾ എന്നാണ് കണക്കുകൾ വ്യക്തമാക്കുന്നത്.

ഈ കണക്ക് ഓരോ ജില്ലകളിലെയും കോർപ്പറേഷൻ, നഗരസഭാ വാർഡുകൾ, ജില്ലാ പഞ്ചായത്തുകൾ എന്നിവയിലെ മാത്രം വോട്ടുകൾ ഉൾപ്പെടുത്തിയുള്ളതാണ്. ബിജെപി സ്ഥാനാർത്ഥികൾ ഇല്ലാതിരുന്ന ഇടങ്ങളിലെയും, സ്വതന്ത്ര സ്ഥാനാർത്ഥികളെ പിന്തുണച്ച ബിജെപി അനുഭാവികളുടെയും, പൊതുവെ ജയസാദ്ധ്യതയില്ലാത്ത ജില്ലാ പഞ്ചായത്തുകളിലേക്ക് വോട്ട് ചെയ്യാതെ വിട്ടുപോയവരുടെയും വോട്ടുകൾ ഇതിൽ ഉൾപ്പെടുന്നില്ല എന്നതും ശ്രദ്ധേയമാണ്.

2020 തദ്ദേശ തിരഞ്ഞെടുപ്പിൽ ബിജെപിക്ക് സംസ്ഥാനത്ത് ലഭിച്ചത് ഏകദേശം 31 ലക്ഷം വോട്ടുകളായിരുന്നു. എന്നാൽ തുടർന്ന് നടന്ന രാഷ്ട്രീയ അഡ്ജസ്റ്റ്മെന്റുകളും ആത്മവിശ്വാസം തകർത്ത സാഹചര്യങ്ങളും മൂലം 2021 നിയമസഭാ തിരഞ്ഞെടുപ്പിൽ ബിജെപി നേടിയത് 25 ലക്ഷത്തിൽ താഴെ വോട്ടുകൾ മാത്രമായിരുന്നു.
അതേസമയം, 2024 ലോക്സഭാ തിരഞ്ഞെടുപ്പിൽ, പ്രത്യേകിച്ച് സുരേഷ് ഗോപിയുടെ വിജയത്തിന്റെ പിന്തുണയോടെ, ബിജെപി 37,99,899 വോട്ടുകൾ നേടി മികച്ച പ്രകടനം കാഴ്ചവച്ചു.

2025 തദ്ദേശ തിരഞ്ഞെടുപ്പ് – ജില്ല തിരിച്ചുള്ള ബിജെപി വോട്ടുകൾ

(ബ്രാക്കറ്റിൽ 2024 ലോക്സഭ വോട്ട്)

• തിരുവനന്തപുരം – 5,09,562 (6,45,630)
• കൊല്ലം – 3,25,924 (2,70,508)
• പത്തനംതിട്ട – 1,41,396 (1,88,382)
• ആലപ്പുഴ – 2,76,189 (3,12,563)
• കോട്ടയം – 1,85,492 (1,98,516)
• ഇടുക്കി – 71,131 (87,695)
• എറണാകുളം – 2,65,015 (2,16,926)
• തൃശൂർ – 4,11,060 (5,55,007)
• പാലക്കാട് – 3,48,798 (3,73,564)
• മലപ്പുറം – 1,97,686 (2,22,951)
• കോഴിക്കോട് – 2,82,489 (2,66,587)
• വയനാട് – 74,181 (85,653)
• കണ്ണൂർ – 1,92,644 (1,76,397)
• കാസർഗോഡ് – 1,67,759 (1,99,530)

കൊല്ലം, എറണാകുളം, കോഴിക്കോട്, കണ്ണൂർ ജില്ലകളിൽ ബിജെപി വോട്ട് വർധനവ് രേഖപ്പെടുത്തിയിട്ടുണ്ട്. തിരുവനന്തപുരം, ആലപ്പുഴ, തൃശൂർ ജില്ലകളിൽ ലോക്സഭാ തിരഞ്ഞെടുപ്പിൽ വ്യക്തിപരമായ വോട്ടുകൾ നിർണായകമായിരുന്നു എന്നും കണക്കുകൾ സൂചിപ്പിക്കുന്നു.

ഈ കണക്കുകൾ പരിശോധിച്ചാൽ സംഘടനാപരമായി പണിത പ്രദേശങ്ങളും പണിയാത്ത പ്രദേശങ്ങളും വ്യക്തമായി തിരിച്ചറിയാൻ കഴിയുമെന്ന് വിനയ് മൈനാഗപ്പള്ളി വിലയിരുത്തുന്നു. പത്തനംതിട്ട, പാലക്കാട്, കാസർഗോഡ് തുടങ്ങിയ ജില്ലകൾ ഉദാഹരണമായി അദ്ദേഹം ചൂണ്ടിക്കാട്ടുന്നു.

അഡ്ജസ്റ്റ്മെന്റുകളുടെ രാഷ്ട്രീയം: മൈനാഗപ്പള്ളി ഉദാഹരണം

2015 മുതൽ ബിജെപി കൈവശം വച്ചിരുന്ന മൈനാഗപ്പള്ളി മൂന്നാം വാർഡിൽ ഇത്തവണ 541 വോട്ടുകൾ നേടിയിട്ടും ബിജെപി സ്ഥാനാർത്ഥി ജലജ രണ്ടാം സ്ഥാനത്തേക്ക് തള്ളപ്പെട്ടത്, ഇടതും വലതും ചേർന്ന അഡ്ജസ്റ്റ്മെന്റുകളുടെ ഉദാഹരണമാണെന്നും അദ്ദേഹം ആരോപിക്കുന്നു. ഇവിടെ യുഡിഎഫ് സ്ഥാനാർത്ഥിക്ക് ലഭിച്ചത് വെറും 103 വോട്ടുകളായിരുന്നു.

കോർപ്പറേഷനുകളിൽ ബിജെപിയുടെ വളർച്ച വ്യക്തമായിക്കൊണ്ടിരിക്കുമ്പോൾ, നഗരസഭകളിൽ മുസ്ലിം വിഭാഗത്തിന്റെ സംഘടിത രാഷ്ട്രീയ മുന്നേറ്റം സംസ്ഥാനമാകെ നടക്കുന്നതായും കണക്കുകൾ സൂചിപ്പിക്കുന്നുവെന്ന് വിനയ് മൈനാഗപ്പള്ളി പറയുന്നു.

മുന്നോട്ടുള്ള വഴി

നിയമസഭാ തിരഞ്ഞെടുപ്പിന് മുൻപേ തന്നെ സ്ഥാനാർത്ഥികളെ പ്രഖ്യാപിച്ച് ജനസമ്പർക്ക പരിപാടികൾ ആരംഭിച്ചാൽ, അടുത്ത നിയമസഭാ തിരഞ്ഞെടുപ്പിൽ ബിജെപിക്ക് അത്ഭുതങ്ങൾ സൃഷ്ടിക്കാൻ കഴിയുമെന്ന് അദ്ദേഹം വിലയിരുത്തുന്നു.
സാധ്യമായാൽ ജോസ് കെ. മാണി, ട്വന്റി-ട്വന്റി പോലുള്ള രാഷ്ട്രീയ ശക്തികളെ കൂടെ കൂട്ടുന്നതും നിർണായകമാകുമെന്ന് അഭിപ്രായപ്പെടുന്നു.

Janatha TV News
(നവ മാധ്യമ പ്രവർത്തകൻ വിനയ് മൈനാഗപ്പള്ളി എഴുതുന്നു.)