ബംഗ്ലാദേശിൽ ഹിന്ദു യുവാവിനെ ആൾക്കൂട്ടം ക്രൂരമായി കൊലപ്പെടുത്തി; സംഭവം അസഹനീയമെന്ന് ശശി തരൂർ

 

ബംഗ്ലാദേശിൽ ഹിന്ദുവിനെ ആൾക്കൂട്ടം ക്രൂരമായി കൊലപ്പെടുത്തി; സംഭവം അസഹനീയമെന്ന് ശശി തരൂർ

ധാക്ക: ബംഗ്ലാദേശിൽ ഒരു ഹിന്ദു യുവാവിനെ മതനിന്ദ ആരോപിച്ച് ആൾക്കൂട്ടം ക്രൂരമായി കൊലപ്പെടുത്തിയ സംഭവം അന്താരാഷ്ട്ര തലത്തിൽ ശക്തമായ പ്രതിഷേധം ഉയർത്തുന്നു. സംഭവത്തിൽ പ്രതികരണവുമായി കോൺഗ്രസ് നേതാവ് ശശി തരൂർ രംഗത്തെത്തി.

മൈമെൻസിങ് നഗരത്തിലെ ഒരു ഫാക്ടറി തൊഴിലാളിയായ 25 വയസ്സുള്ള ദിപു ചന്ദ്ര ദാസ് ആണ് കൊല്ലപ്പെട്ടത്. ബംഗ്ലാ ട്രിബ്യൂൺ റിപ്പോർട്ട് ചെയ്യുന്നതനുസരിച്ച്, വ്യാഴാഴ്ച രാത്രി ഫാക്ടറിക്ക് പുറത്ത് ഒരു ജനക്കൂട്ടം ദാസിനെ മർദ്ദിക്കുകയും പിന്നീട് മരത്തിൽ കെട്ടിത്തൂക്കുകയും ചെയ്‌തു. മതനിന്ദ ആരോപിച്ചായിരുന്നു ആക്രമണം.

സംഭവത്തെ “അസഹനീയമാംവിധം ദാരുണം” എന്ന് വിശേഷിപ്പിച്ച ശശി തരൂർ, ധാക്ക സർക്കാർ സംഭവത്തിൽ ഔദ്യോഗികമായി അപലപനം രേഖപ്പെടുത്തിയതിനെ അഭിനന്ദിച്ചു. എന്നാൽ, അത് മാത്രം മതിയാകില്ലെന്ന് അദ്ദേഹം വ്യക്തമാക്കി.

“ഈ പാവപ്പെട്ട ഹിന്ദു മനുഷ്യനെ പറഞ്ഞറിയിക്കാനാവാത്ത കുറ്റവാളികളുടെ കൈകളാൽ നഷ്ടപ്പെട്ടതിൽ അതീവ ദുഃഖമുണ്ട്. ബംഗ്ലാദേശ് സർക്കാരിന്റെ അപലപനം അഭിനന്ദനാർഹമാണ്. പക്ഷേ, കൊലപാതകികളെ ശിക്ഷിക്കാൻ അവർ എന്ത് നടപടികളാണ് സ്വീകരിക്കുന്നത്? ഇത്തരം സംഭവങ്ങൾ വീണ്ടും ആവർത്തിക്കാതിരിക്കാൻ എന്ത് സംവിധാനങ്ങളാണ് ഒരുക്കുന്നത്?” — ശശി തരൂർ ചോദിച്ചു.

കഴിഞ്ഞ വർഷം ഓഗസ്റ്റിൽ അന്നത്തെ പ്രധാനമന്ത്രി ഷെയ്ഖ് ഹസീനയെ പുറത്താക്കിയതിന് പിന്നാലെ, ബംഗ്ലാദേശിൽ ന്യൂനപക്ഷ സമുദായങ്ങൾക്കെതിരായ ആക്രമണങ്ങൾ വർധിച്ചുവെന്ന ആശങ്കയും റിപ്പോർട്ടുകൾ ഉയർത്തുന്നുണ്ട്. പ്രത്യേകിച്ച് ഹിന്ദു സമൂഹം ലക്ഷ്യമിടുന്ന സംഭവങ്ങൾ രാജ്യത്ത് തുടരുന്ന ജനക്കൂട്ട ഭരണത്തിന്റെ ഭീതികരമായ അവസ്ഥയിലേക്കാണ് വിരൽ ചൂണ്ടുന്നതെന്ന് നിരീക്ഷകർ പറയുന്നു.