ശബരിമല ദർശനത്തിനുശേഷം മടങ്ങവേ അപകടം; ഒമ്പതുവയസ്സുകാരൻ ദേവപ്രയാഗിന് മസ്തിഷ്കമരണം സംഭവിച്ചു — അവയവദാനത്തിലൂടെ നാലുപേർക്ക് പുതുജീവൻ

 ജനത ടിവി ന്യൂസ് റിപ്പോർട്ട്

ശബരിമല ദർശനത്തിനുശേഷം മടങ്ങവേ അപകടം; ഒമ്പതുവയസ്സുകാരൻ ദേവപ്രയാഗിന് മസ്തിഷ്കമരണം സംഭവിച്ചു — അവയവദാനത്തിലൂടെ നാലുപേർക്ക് പുതുജീവൻ

തിരുവനന്തപുരം: ശബരിമല ദർശനം കഴിഞ്ഞ് മടങ്ങുന്നതിനിടെ ഉണ്ടായ വാഹനാപകടത്തിൽ മസ്തിഷ്കമരണം സംഭവിച്ച ഒമ്പതുവയസ്സുകാരൻ ദേവപ്രയാഗിന്റെ വേർപാട് കേരളത്തെ മുഴുവൻ നൊമ്പരത്തിലാഴ്ത്തുന്നു. എന്നാൽ, ആ തീരാവേദനയുടെ നിമിഷത്തിൽ പോലും “എന്റെ മകൻ മറ്റുള്ളവരിലൂടെ ജീവിക്കട്ടെ” എന്ന മഹത്തായ തീരുമാനമെടുത്ത അമ്മ അഖിലയും കുടുംബവും മനുഷ്യസ്നേഹത്തിന്റെ ഉദാത്ത മാതൃകയായി മാറുകയാണ്.

വ്യാഴാഴ്ച രാത്രി മസ്തിഷ്കമരണം സ്ഥിരീകരിച്ചതിനെ തുടർന്ന് ദേവപ്രയാഗിന്റെ വൃക്ക, കരൾ, ഹൃദയ വാൽവ്, രണ്ട് നേത്രപടലങ്ങൾ എന്നിവ ദാനം ചെയ്യാൻ കുടുംബം സമ്മതം അറിയിച്ചു. ഈ അവയവദാനം നാലുപേർക്ക് പുതുജീവിതം സമ്മാനിക്കുമെന്ന് ആരോഗ്യവകുപ്പ് അറിയിച്ചു.

പൂജപ്പുര പുന്നയ്ക്കാമുകൾ ആറാമട നെടുമ്പറത്തുവീട്ടിലെ ദേവപ്രയാഗ് ശാരീരികമായി വിടവാങ്ങുമ്പോഴും, അവന്റെ നന്മയും സ്നേഹവും സമൂഹത്തിന്റെ ഓർമ്മകളിൽ അനശ്വരമായി നിലനിൽക്കുകയാണ്. സ്വന്തം ഏകമകനെ നഷ്ടപ്പെട്ട ദുഃഖത്തിൽ തളരാതെ, മരണത്തിലും മഹത്വമുണ്ടെന്ന് ലോകത്തിന് കാണിച്ചുകൊടുത്ത അമ്മ അഖിലയുടെ നിശ്ചയദാർഢ്യം വാക്കുകൾക്കതീതമാണെന്ന് സമൂഹം പറയുന്നു.

ഒരു കുഞ്ഞുജീവനെ വിധിയുടെ ക്രൂരത തട്ടിയെടുത്തപ്പോഴും, അവന്റെ അവയവങ്ങളിലൂടെ മറ്റുള്ളവർക്ക് ശ്വസിക്കാനും കാണാനും ജീവിക്കാനും അവസരമൊരുക്കിയതിലൂടെ, ഈ കുടുംബം മരണത്തെ പോലും തോൽപ്പിച്ച മനുഷ്യത്വത്തിന്റെ വലിയ സന്ദേശമാണ് നൽകുന്നത്.

പൂജപ്പുരയിലെ ആ കൊച്ചു വീട്ടിൽ നിന്ന് ഉയർന്ന ഈ സന്ദേശം അവയവദാനത്തിന്റെ പ്രാധാന്യത്തെക്കുറിച്ചും സഹജീവിസ്നേഹത്തെക്കുറിച്ചുമുള്ള ശക്തമായ ഓർമ്മപ്പെടുത്തലായി മാറട്ടെയെന്ന പ്രാർത്ഥനയോടെ, ദേവപ്രയാഗ് എന്ന ആ കുഞ്ഞുമാലാഖയുടെ പവിത്ര സ്മരണയ്ക്ക് ജനത ടിവി പ്രണാമം അർപ്പിക്കുന്നു.