നീറ്റ് യുജി പുനഃപരീക്ഷ ഇന്ന്; 22 ലക്ഷത്തിലേറെ വിദ്യാർഥികൾ പരീക്ഷയെഴുതും

നീറ്റ് യുജി പുനഃപരീക്ഷ ഇന്ന്; 22 ലക്ഷത്തിലേറെ വിദ്യാർഥികൾ പരീക്ഷയെഴുതും

ന്യൂഡൽഹി: രാജ്യത്തെ മെഡിക്കൽ പ്രവേശനത്തിനായുള്ള നീറ്റ് യുജി (NEET-UG) പുനഃപരീക്ഷ ഇന്ന് നടക്കും. ഉച്ചയ്ക്ക് 2 മണി മുതൽ 5.15 വരെയാണ് പരീക്ഷ. ഭിന്നശേഷിക്കാരായ വിദ്യാർഥികൾക്ക് അധിക സമയം അനുവദിച്ചിട്ടുണ്ട്. രാജ്യത്തും വിദേശത്തുമായി 22 ലക്ഷത്തിലധികം വിദ്യാർഥികളാണ് പരീക്ഷയ്ക്ക് ഹാജരാകുന്നത്.

രാജ്യത്തെ 551 നഗരങ്ങളിലെയും വിദേശത്തെ 14 കേന്ദ്രങ്ങളിലെയും പരീക്ഷാകേന്ദ്രങ്ങളിലാണ് പരീക്ഷ നടക്കുന്നത്. മുൻ പരീക്ഷയുടെ ചോദ്യപ്പേപ്പർ ചോർച്ചയെ തുടർന്നാണ് ദേശീയ പരീക്ഷാ ഏജൻസിയായ എൻടിഎ പുനഃപരീക്ഷ നടത്തുന്നത്.

രാവിലെ 11 മണി മുതൽ ഉച്ചയ്ക്ക് 1.30 വരെ വിദ്യാർഥികൾ പരീക്ഷാകേന്ദ്രങ്ങളിൽ റിപ്പോർട്ട് ചെയ്യണം. 1.30ന് ശേഷം എത്തുന്നവർക്ക് പ്രവേശനം അനുവദിക്കില്ല. അഡ്മിറ്റ് കാർഡ്, ഫോട്ടോ പതിച്ച തിരിച്ചറിയൽ രേഖ, പാസ്‌പോർട്ട് സൈസ് ഫോട്ടോകൾ എന്നിവ നിർബന്ധമായും കൈവശം കരുതണമെന്ന് എൻടിഎ നിർദേശിച്ചു.

പരീക്ഷയുടെ വിശ്വാസ്യത ഉറപ്പാക്കുന്നതിനായി രാജ്യവ്യാപകമായി കർശന സുരക്ഷയാണ് ഒരുക്കിയിരിക്കുന്നത്. പരീക്ഷാകേന്ദ്രങ്ങളിൽ സിസിടിവി നിരീക്ഷണം, ബയോമെട്രിക് പരിശോധന, മുഖം തിരിച്ചറിയൽ സംവിധാനം, ജാമറുകൾ എന്നിവ സജ്ജമാക്കിയിട്ടുണ്ട്. ചോദ്യപ്പേപ്പറുകളുടെ സുരക്ഷിത വിതരണത്തിനായി പ്രത്യേക ക്രമീകരണങ്ങളും ഏർപ്പെടുത്തിയിട്ടുണ്ട്.

ഇതിനിടെ, വ്യാജ ചോദ്യപ്പേപ്പറുകൾ വിൽക്കാമെന്ന് വാഗ്ദാനം ചെയ്ത് വിദ്യാർഥികളെ തട്ടിപ്പിന് ഇരയാക്കാൻ ശ്രമിച്ച സംഭവങ്ങൾ റിപ്പോർട്ട് ചെയ്ത സാഹചര്യത്തിൽ ജാഗ്രത പാലിക്കണമെന്ന് അധികൃതർ മുന്നറിയിപ്പ് നൽകി. കർശന പരിശോധനകൾക്ക് ശേഷമായിരിക്കും വിദ്യാർഥികളെ പരീക്ഷാ ഹാളിലേക്ക് പ്രവേശിപ്പിക്കുക.