കോൺഗ്രസിന്റെ വിദേശ ഫണ്ട് ബന്ധം: സോഷ്യൽ മീഡിയ അവകാശവാദങ്ങൾ നിഷേധിച്ച് പവൻ ഖേരയുടെ ഭാര്യ കോട്ട നീലിമ

 

കോൺഗ്രസിന്റെ വിദേശ ഫണ്ട് ബന്ധം: സോഷ്യൽ മീഡിയ അവകാശവാദങ്ങൾ നിഷേധിച്ച് പവൻ ഖേരയുടെ ഭാര്യ കോട്ട നീലിമ

ന്യൂഡൽഹി:

കോൺഗ്രസ് പാർട്ടിയുമായി ബന്ധപ്പെട്ട വിദേശ ധനസഹായ ഫണ്ടുകളുടെ ഉപയോഗത്തെ കുറിച്ച് സോഷ്യൽ മീഡിയയിൽ ഉയർന്ന അവകാശവാദങ്ങൾ കോൺഗ്രസ് ദേശീയ വക്താവ് പവൻ ഖേരയുടെ ഭാര്യയും എഴുത്തുകാരിയുമായ കോട്ട നീലിമ ശക്തമായി നിഷേധിച്ചു. തനിക്കെതിരെ ഉയർന്ന ആരോപണങ്ങൾ അപകീർത്തികരമാണെന്ന് വ്യക്തമാക്കിയ നീലിമ, ഇതുമായി ബന്ധപ്പെട്ട് സിവിൽ, ക്രിമിനൽ നടപടികൾ സ്വീകരിക്കുമെന്ന് പ്രഖ്യാപിച്ചു.

കോൺഗ്രസ് പാർട്ടിയുമായി ബന്ധമുള്ള വിദേശ ഫണ്ട് ഉപയോഗിച്ച് പ്രവർത്തിക്കുന്ന ഒരു മാധ്യമ സ്വാധീന ശൃംഖലയുടെ കേന്ദ്രബിന്ദുവാണ് കോട്ട നീലിമ എന്ന തരത്തിലുള്ള ആരോപണങ്ങളാണ് സോഷ്യൽ മീഡിയ ത്രെഡുകളിലൂടെ പ്രചരിക്കുന്നത്. ഇതോടെ ഓൺലൈൻ തലത്തിൽ വലിയ വിവാദമാണ് രൂപപ്പെട്ടിരിക്കുന്നത്.

സോഷ്യൽ മീഡിയയിലെ അവകാശവാദങ്ങൾ പ്രകാരം, കോൺഗ്രസ് പാർട്ടി, വിദേശ ധനസഹായം, മാധ്യമങ്ങളിലെ ചില വിഭാഗങ്ങൾ എന്നിവ ചേർന്ന ഒരു ആവാസവ്യവസ്ഥയുടെ ഭാഗമാണ് നീലിമയെന്നാണ് ആരോപണം. കോൺഗ്രസ് വർക്കിംഗ് കമ്മിറ്റി അംഗവും തെലങ്കാന പ്രദേശ് കോൺഗ്രസ് കമ്മിറ്റിയുടെ മുൻ വൈസ് പ്രസിഡന്റുമാണെന്ന രീതിയിലാണ് ചില പോസ്റ്റുകൾ നീലിമയെ പരിചയപ്പെടുത്തുന്നത്.

ഡൽഹി ആസ്ഥാനമായുള്ള PROTO എന്ന സംഘടനയുമായി നീലിമയ്ക്ക് ബന്ധമുണ്ടെന്നും, യുഎസ് ആസ്ഥാനമായുള്ള ഇന്റർനാഷണൽ സെന്റർ ഫോർ ജേണലിസ്റ്റ്സ് (ICFJ) യുമായി ബന്ധപ്പെട്ട ചില മോദി വിരുദ്ധ അംഗങ്ങൾ 2018-ൽ സ്ഥാപിച്ചതാണ് പ്രോട്ടോ എന്നുമാണ് പ്രചാരണം. തുടർന്ന് ദക്ഷിണേഷ്യൻ പ്രവർത്തനങ്ങളിൽ പങ്കാളിയായി നീലിമ പ്രവർത്തിച്ചുവെന്ന ആരോപണവും ഉന്നയിക്കപ്പെടുന്നു.

പാശ്ചാത്യ സർക്കാരുകൾ, ഫൗണ്ടേഷനുകൾ, മാധ്യമ ബന്ധമുള്ള സ്ഥാപനങ്ങൾ എന്നിവയിൽ നിന്നുള്ള ഫണ്ട് ഇന്ത്യയിലേക്ക് എത്തിക്കുകയും, കേന്ദ്ര മോദി സർക്കാരിനെ വിമർശിക്കുന്ന തരത്തിലുള്ള വിവാദപരമായ ആഖ്യാനങ്ങൾ പ്രചരിപ്പിക്കാൻ ഇത് ഉപയോഗിക്കുന്നുവെന്നുമാണ് സോഷ്യൽ മീഡിയ പോസ്റ്റുകളിലെ ആരോപണം.

എന്നാൽ, ഈ എല്ലാ ആരോപണങ്ങളും അടിസ്ഥാനരഹിതമാണെന്നും വ്യക്തിപരമായും പ്രൊഫഷണൽമായും തനിക്ക് യാതൊരു ബന്ധവുമില്ലാത്ത കാര്യങ്ങൾ ചേർത്ത് അപകീർത്തിപ്പെടുത്താനുള്ള ശ്രമമാണിതെന്നും കോട്ട നീലിമ വ്യക്തമാക്കി. നിയമപരമായ നടപടികളിലൂടെ സത്യം പുറത്തുകൊണ്ടുവരുമെന്നും അവർ അറിയിച്ചു.