നളന്ദയിൽ അദ്ഭുതം; ബീഹാറിന്റെ പുരോഗതിയെ വാഴ്ത്തി ശശി തരൂർ

 നളന്ദയിൽ അദ്ഭുതം; ബീഹാറിന്റെ പുരോഗതിയെ വാഴ്ത്തി ശശി തരൂർ

രാജ്ഗിർ | ജനത TV ന്യൂസ്

“ഞാൻ നളന്ദ കണ്ടപ്പോൾ അത്ഭുതപ്പെട്ടുപോയി… എന്തൊരു മാറ്റമാണിവിടെ!”

ബീഹാറിലെ പുരോഗതിയെ അളവറ്റു പ്രശംസിച്ച് കോൺഗ്രസ് എംപി ശശി തരൂർ.

ബീഹാറിലെ രാജ്ഗിറിൽ സംഘടിപ്പിച്ച നളന്ദ സാഹിത്യോത്സവം ഉദ്ഘാടനം ചെയ്യാനെത്തിയതായിരുന്നു തിരുവനന്തപുരം എംപി ശശി തരൂർ. ചടങ്ങിനിടെ മാത്രമല്ല, മാധ്യമങ്ങളോടും സമൂഹമാധ്യമങ്ങളിലും അദ്ദേഹം ബീഹാറിലെ വികസനത്തെ തുറന്നു വാഴ്ത്തി.

താൻ മുൻപ് കേട്ടിരുന്നതിനേക്കാൾ വളരെ മെച്ചപ്പെട്ട അടിസ്ഥാന സൗകര്യങ്ങളാണ് ഇന്ന് ബീഹാറിൽ കാണുന്നതെന്ന് തരൂർ പറഞ്ഞു.

“റോഡുകൾ മികച്ചതാണ്. രാത്രി ഏറെ വൈകിയും സ്ത്രീകളടക്കം ആളുകൾ സുരക്ഷിതമായി തെരുവിലിറങ്ങുന്നുണ്ട്. മുൻകാലങ്ങളിൽ ഇതൊന്നും സാധാരണമായിരുന്നില്ല,” എന്നും അദ്ദേഹം വ്യക്തമാക്കി.

സമീപ വർഷങ്ങളിൽ ബീഹാറിൽ നിരവധി നല്ല കാര്യങ്ങൾ സംഭവിച്ചതിൽ സന്തോഷമുണ്ടെന്നും, സംസ്ഥാനത്തിന്റെ ഇന്നത്തെ പുരോഗതി കാണുന്നതിൽ തനിക്ക് വലിയ അഭിമാനമുണ്ടെന്നും ശശി തരൂർ പറഞ്ഞു.

“ബീഹാറിലെ ജനങ്ങളും അവരുടെ പ്രതിനിധികളും ഈ പുരോഗതി പൂർണ്ണമായി അർഹിക്കുന്നു,” എന്നും അദ്ദേഹം കൂട്ടിച്ചേർത്തു.

അതേസമയം, നളന്ദ യൂണിവേഴ്‌സിറ്റി കാമ്പസിന്റെ ആകാശദൃശ്യങ്ങൾ പങ്കുവെച്ച മുൻ നീതി ആയോഗ് ചെയർപേഴ്‌സൺ അമിതാഭ് കാന്തിന്റെ എക്സ് പോസ്റ്റിന് മറുപടിയായി, കേന്ദ്ര സർക്കാരിനെയും വിദേശകാര്യ മന്ത്രാലയത്തെയും ശശി തരൂർ തുറന്നടിച്ച് പ്രശംസിച്ചു.

“ഇത് നമ്മുടെ രാജ്യത്തിന് വിദേശകാര്യ മന്ത്രാലയം നൽകിയ ഏറ്റവും വിലമതിക്കാനാകാത്ത നേട്ടങ്ങളിലൊന്നാണ്.

ഈ അത്ഭുതകരമായ നേട്ടത്തിന് വിദേശകാര്യ മന്ത്രി ഡോ. എസ്. ജയ്ശങ്കറിനും, ഇത് സാധ്യമാക്കിയ നമ്മുടെ മികവുറ്റ വിദേശകാര്യ മന്ത്രാലയത്തിനും എന്റെ ഊഷ്മളമായ അഭിനന്ദനങ്ങൾ,”

എന്നും തരൂർ കുറിച്ചു.

കോൺഗ്രസ് നേതാവിൽ നിന്നുതന്നെ കേന്ദ്ര സർക്കാരിനും എൻഡിഎ ഭരണത്തിലുള്ള ബീഹാറിനും ലഭിച്ച ഈ തുറന്ന അംഗീകാരം, ദേശീയ രാഷ്ട്രീയത്തിൽ പുതിയ ചർച്ചകൾക്ക് വഴിതുറക്കുകയാണ്.