ക്രൈസ്തവ സമൂഹം സത്യം തിരിച്ചറിയുന്നു; സിപിഎം–കോൺഗ്രസ് നുണകൾ പൊളിയുന്നു – രാജീവ് ചന്ദ്രശേഖർ

 

ക്രൈസ്തവ സമൂഹം സത്യം തിരിച്ചറിയുന്നു; സിപിഎം–കോൺഗ്രസ് നുണകൾ പൊളിയുന്നു – രാജീവ് ചന്ദ്രശേഖർ

തിരുവനന്തപുരം:

കേരളത്തിലെ ക്രൈസ്തവ സമൂഹം സത്യം തിരിച്ചറിയുന്നവരാണെന്നും അതുകൊണ്ടുതന്നെ സിപിഎമ്മിന്റെയും കോൺഗ്രസിന്റെയും മറ്റൊരു നുണ കൂടി പുറത്തുവന്നിരിക്കുകയാണെന്നും കേന്ദ്രമന്ത്രി രാജീവ് ചന്ദ്രശേഖർ പറഞ്ഞു.

പതിറ്റാണ്ടുകളായി ബിജെപിയെ ‘വർഗീയ പാർട്ടി’യായി ചിത്രീകരിക്കാൻ സിപിഎമ്മും കോൺഗ്രസും സംഘടിതമായി ശ്രമിച്ചുവെന്നും എന്നാൽ വോട്ടുബാങ്ക് രാഷ്ട്രീയത്തിനായി ജമാഅത്തെ ഇസ്‌ലാമി, എസ്ഡിപിഐ തുടങ്ങിയ തീവ്രവാദ ചിന്താധാരകളുമായി പരസ്യമായി സഖ്യം സ്ഥാപിക്കുന്നത് ഇവർ തന്നെയാണെന്നും അദ്ദേഹം ആരോപിച്ചു.

ഇത്തരത്തിലുള്ള കള്ളപ്രചാരണങ്ങളുടെ കാലം അവസാനിക്കുകയാണെന്നും മലയാളികൾ ഇന്ന് യഥാർത്ഥ വ്യത്യാസം തിരിച്ചറിയുന്നുണ്ടെന്നും രാജീവ് ചന്ദ്രശേഖർ വ്യക്തമാക്കി. വികസനം, തൊഴിൽ, അവസരങ്ങൾ, എല്ലാ മലയാളികൾക്കും മികച്ചൊരു ഭാവി തുടങ്ങിയ വിഷയങ്ങളാണ് ബിജെപി മുൻനിർത്തുന്നതെന്നും വോട്ടിനായി ദേശവിരുദ്ധ ശക്തികളുമായി കൈകോർക്കുന്ന രാഷ്ട്രീയമല്ല ബിജെപിയുടേതെന്നും അദ്ദേഹം പറഞ്ഞു.

പ്രധാനമന്ത്രി നരേന്ദ്ര മോദിയുടെ കാഴ്ചപ്പാടുകളിലും പ്രവർത്തന മികവിലും മലയാളികൾക്ക് ശക്തമായ വിശ്വാസമുണ്ടെന്നും വികസനത്തിന്റെയും പ്രവർത്തനക്ഷമതയുടെയും രാഷ്ട്രീയം ഓരോ വീട്ടിലേക്കും എത്തുന്നതിനെ ഒരു നുണയ്ക്കും തടയാനാകില്ലെന്നും അദ്ദേഹം കൂട്ടിച്ചേർത്തു.

ഇടത്–വലത് മുന്നണികളുടെ അഴിമതിയുടെയും ഭയപ്പെടുത്തലിന്റെയും കള്ളങ്ങളുടെയും രാഷ്ട്രീയം അവസാനത്തിലേക്കാണ് നീങ്ങുന്നതെന്നും ഒരു പുതിയ രാഷ്ട്രീയ സംസ്കാരത്തിനായി കേരളം തയ്യാറായിക്കഴിഞ്ഞുവെന്നും രാജീവ് ചന്ദ്രശേഖർ വ്യക്തമാക്കി.