ന്യൂഡൽഹി: 2047-ഓടെ ഇന്ത്യയെ വികസിത രാജ്യമാക്കാനുള്ള ദിശയിൽ മുന്നേറുന്ന

 

ന്യൂഡൽഹി: 2047-ഓടെ ഇന്ത്യയെ വികസിത രാജ്യമാക്കാനുള്ള ദിശയിൽ മുന്നേറുന്ന മോദി സർക്കാരിന്റെ ഇടപെടലിലൂടെ രാജ്യത്തിന്റെ വിവിധ ഭാഗങ്ങളിലെ ദീർഘകാല പ്രശ്നങ്ങൾക്ക് പരിഹാരം കാണുന്ന പ്രവർത്തനങ്ങൾ തുടരുകയാണ്. അതിന്റെ ഭാഗമായി, 32 വർഷത്തിലേറെയായി ഹരിയാനയും രാജസ്ഥാനും തമ്മിൽ നിലനിന്നിരുന്ന യമുനാ ജല തർക്കത്തിന് ചരിത്രപരമായ പരിഹാരമായി ധാരണയായി.

തിങ്കളാഴ്ച ന്യൂഡൽഹിയിൽ കേന്ദ്ര ആഭ്യന്തര മന്ത്രി അമിത് ഷാ, കേന്ദ്ര ജലശക്തി മന്ത്രി സി.ആർ. പാട്ടീൽ എന്നിവരുടെ സാന്നിധ്യത്തിൽ ഹരിയാന മുഖ്യമന്ത്രി നായബ് സിംഗ് സൈനിയും രാജസ്ഥാൻ മുഖ്യമന്ത്രി ഭജൻലാൽ ശർമ്മയും തമ്മിലാണ് യമുനാ ജല പദ്ധതി ധാരണാപത്രത്തിൽ ഒപ്പുവെച്ചത്.

ഏകദേശം 34,102 കോടി രൂപ ചെലവിൽ നടപ്പാക്കുന്ന ഈ വൻ പദ്ധതി രാജസ്ഥാനിലെ കുടിവെള്ളക്ഷാമം രൂക്ഷമായ ഷെഖാവതി മേഖലക്ക് വലിയ ആശ്വാസമാകുമെന്നാണ് പ്രതീക്ഷ. കൂടാതെ ജലസേചന സൗകര്യം മെച്ചപ്പെടുന്നതോടെ കൃഷി വികസനത്തിനും ഇത് വലിയ പിന്തുണ നൽകും.

1994 മെയ് 12-ന് ഉത്തർപ്രദേശ്, ഹരിയാന, രാജസ്ഥാൻ, ഹിമാചൽ പ്രദേശ്, ഡൽഹി എന്നീ സംസ്ഥാനങ്ങൾ ചേർന്ന് രൂപീകരിച്ച അപ്പർ യമുനാ റിവർ ബോർഡ് കരാർ പ്രകാരം രാജസ്ഥാനിന് പ്രതിവർഷം 577 ദശലക്ഷം ക്യുബിക് മീറ്റർ യമുനാ ജലത്തിന് അവകാശമുണ്ടായിരുന്നു. എന്നാൽ ആവശ്യമായ കനാൽ ശൃംഖല നിർമിക്കപ്പെടാത്തതിനാൽ ജലം ലഭ്യമാക്കുന്നതിൽ വർഷങ്ങളായി തടസ്സമുണ്ടായിരുന്നു.

ഇപ്പോൾ പരമ്പരാഗത കനാൽ സംവിധാനത്തിന് പകരം അത്യാധുനിക ഭൂഗർഭ പൈപ്പ് ലൈൻ സംവിധാനം ഉപയോഗിക്കാൻ ഇരുസംസ്ഥാനങ്ങളും തീരുമാനിച്ചതോടെയാണ് തർക്കത്തിന് സ്ഥിരപരിഹാരം കണ്ടെത്തിയത്.

പുതിയ പദ്ധതിപ്രകാരം ഹരിയാനയിലെ ഹത്നികുണ്ഡ് ബാരേജിൽ നിന്ന് രാജസ്ഥാനിലെ ചുരു ജില്ലയിലെ ഹൻസിയാവാസ് റിസർവോയറിലേക്ക് ഏകദേശം 295.5 കിലോമീറ്റർ നീളമുള്ള ഭൂഗർഭ പൈപ്പ് ലൈൻ നിർമ്മിക്കും. 3.6 മീറ്ററിലധികം വ്യാസമുള്ള മൂന്ന് വലിയ പൈപ്പുകൾ ഇതിനായി സ്ഥാപിക്കും.

ജൂലൈ മുതൽ ഒക്ടോബർ വരെയുള്ള മൺസൂൺ കാലത്ത് ഹത്നികുണ്ഡ് ബാരേജിൽ നിന്ന് ഒഴുകിപ്പോകുന്ന അധിക ജലം രാജസ്ഥാനിലേക്ക് എത്തിച്ച് വലിയ ജലസംഭരണികളിൽ സൂക്ഷിക്കും. ഇതിലൂടെ ഭൂഗർഭ ജലനിരപ്പ് ഉയരുകയും കുടിവെള്ള ലഭ്യത മെച്ചപ്പെടുകയും ചെയ്യും.

അതോടൊപ്പം പൈപ്പ് ലൈൻ കടന്നുപോകുന്ന വഴിയിലെ ഹരിയാനയിലെ ഭിവാനി, ഫത്തേഹാബാദ് ഉൾപ്പെടെ 10 പ്രധാന കേന്ദ്രങ്ങളിൽ കുടിവെള്ള വിതരണ സൗകര്യവും ഒരുക്കുന്നതാണ്. അതിനാൽ ഈ പദ്ധതി ഹരിയാനക്കും രാജസ്ഥാനും ഒരുപോലെ ഗുണകരമാകുന്ന വികസന പദ്ധതിയായി മാറുന്നു.

ജനത TV ന്യൂസ്